Thursday, July 31, 2008

ಹುಟ್ಟುಹಬ್ಬದಂದು ನನ್ನ ಮೊದಲ ಲೇಖನ ಪ್ರಕಟಗೊಂಡಾಗ..

ಹೌದು! ಆಗಸ್ಟ್ 2..ನಾನು ಹುಟ್ಟಿದ ದಿನ. ನೆನಪಾಯಿತು..ಹಳೆಯ ಒಂದಿಷ್ಟು ನೆನಪುಗಳು. ನಾನಗ ಪ್ರಥಮ ಡಿಗ್ರಿ. ಉಜಿರೆಯ ಎಸ್.ಡಿ. ಎಂ. ಕಾಲೇಜು. ನನ್ನ ಕಾಂಬೀನೇಷನ್ ಕನ್ನಡ, ಪತ್ರಿಕೋದ್ಯಮ ಮತ್ತು ಸೈಕಾಲಜಿ. ಕನ್ನಡ ಮತ್ತು ಪತ್ರಿಕೋದ್ಯಮ ಎರಡು ವಿಷಯಗಳು ನನಗೆ ತುಂಬಾ ಇಷ್ಟ. ಪಿಯುಸಿಯಲ್ಲಿ ವಿಜ್ಞಾನ ವಿಷಯ ಓದುತ್ತಿದ್ದರೂ, ಮೇಷ್ಟ್ರು ಪಾಠ ಮಾಡಿದ್ದು ತಲೆಗೆ ಹೋಗುತ್ತಿರಲಿಲ್ಲ. ಯಾಕಂದ್ರೆ ನನಗೆ ವಿಜ್ಞಾನ ವಿಷಯ ಇಷ್ಟನೇ ಇಲ್ಲ. ಯಾರದ್ದೋ ಒತ್ತಾಯಕ್ಕೆ ತೆಗೆದುಕೊಂಡೆ. ಆವಾಗ್ಲೆ ಏನಾದ್ರೂ ಗೀಚಿ ಫೈಲ್ ನೊಳಗೆ ಇಡುವ ಚಾಳಿ ನನಗೆ. ಡಿಗ್ರಿಗೆ ಸೇರಿದ್ದೇ ತಡ, ಅದನ್ನೆಲ್ಲ ಪತ್ರಿಕೆಗಳಿಗೆ ಕಳುಹಿಸಲಾರಂಭಿಸಿದ್ದೆ. ಅದರಲ್ಲೂ ಕನ್ನಡಪ್ರಭದ ಕಾಲೇಜು ರಂಗಕ್ಕೆ ಕಳುಹಿಸಿದಷ್ಟು ಲೇಖನಗಳನ್ನು ಇನ್ಯಾವ ಪತ್ರಿಕೆಗೂ ಕಳುಹಿಸಿಲ್ಲ ಅನಿಸುತ್ತೆ.

ಒಂದು ವರ್ಷ ಎಷ್ಟು ಲೇಖನಗಳು ಏನೆಲ್ಲ ತಿಪ್ಪಾರಲಾಗ ಹಾಕಿ ಬರೆದು ಕಳಿಸಿದ್ರೂ ಪ್ರಕಟವಾಗಿಲ್ಲ. ನನ್ನ ಕ್ಲಾಸಿನ ಎಲ್ಲರ ಬರಹಗಳು ಪತ್ರಿಕೆಗಳಲ್ಲಿ ಪ್ರಕಟವಾಗಿ, ನಮ್ಮ ಜರ್ನಲಿಸಂ ಸರ್ ಡಯಾಸ್ ಎದುರು ನಿಂತು ಅವ್ರ ಹೆಸರು ಹೇಳುವಾಗ, ಕುಳಿತವರೆಲ್ಲ ಚಪ್ಪಾಳೆ ತಟ್ಟುವಾಗ ಎದುರು ಬೆಂಚಿನಲ್ಲಿ ಕುಳಿತ ನನಗೆ ಅಳು ಬರುತ್ತಿತ್ತು. ಆಯಿತು ಒಂದು ವರ್ಷ ಆಯಿತು..ಆದ್ರೂ ಕಾಲೇಜುರಂಗಕ್ಕೆ ಕಳಹುಹಿಸೋದು ನಿಲ್ಲಿಸಿಲ್ಲ..ಬಹುಶಃ ಅದೆಲ್ಲ ಡಸ್ಟ್ ಬಿನ್ ಗೆ ಹೋಗುತ್ತಿತ್ತು.

ದ್ವಿತೀಯ ಬಿ.ಎ. ಆಗಸ್ಟ್ 2..ನನ್ನ ಹುಟ್ಟುಹಬ್ಬ. ಆವಾಗೆಲ್ಲ ಹುಟ್ಟುಹಬ್ಬ ಅಂದ್ರೆ ಹೊಸ ಡ್ರೆಸ್ಸು, ಸ್ವೀಟ್ ಹಂಚೋದು. ಆದ್ರೆ ಈಗ ಆ ಗೀಳು ಇಲ್ಲ. ಅಂದು ಹೊಸ ಚೂಡಿದಾರ ಹಾಕಿದ ನಾನು, ತಲೆತುಂಬಾ ಮಲ್ಲಿಗೆ ಮುಡಿದುಕೊಂಡಿದ್ದೆ. ಜೊತೆಗೆ ಸ್ವೀಟ್...ಲೈಬ್ರೆರಿಗೆ ಹೋಗಿ ಕನ್ನಡಪ್ರಭ ನೋಡಿದಾಗ ನನ್ನ 'ಸ್ನೇಹಿತರು ನಾವಾಗೋಣ' ಲೇಖನ ಪ್ರಕಟವಾಗಿತ್ತು. ಆ ದಿನ ನಂಗೊಂದು ರೀತಿಯಲ್ಲಿ ಹಬ್ಬ..ಆ ದಿನ ನನ್ನ ಹುಟ್ಟುಹಬ್ಬವೂ ಹೌದು! ಖುಷಿಯೋ ಖುಷಿ. ಆಮೇಲೆ ಎರಡು ವರ್ಷದಲ್ಲಿ ಅದೆಷ್ಟೋ ಲೇಖನಗಳು ಎಲ್ಲಾ ಪತ್ರಿಕೆಗಳಲ್ಲೂ ಪ್ರಕಟವಾದುವು. ಈಗಲೂ ನನ್ನ ಹುಟ್ಟುಹಬ್ಬ ಬಂದಾಗಲೆಲ್ಲಾ ಆ ಹಬ್ಬದ ದಿನ ನೆನಪಾಗುವುದುಂಟು.

4 comments:

ಬಾನಾಡಿ said...

ಮುಂಗಡವಾಗಿ ಹುಟ್ಟುಹಬ್ಬದ ಶುಭಾಶಯಗಳು. ಬರೆಯುತ್ತಿರಿ. ಈಗ ನಿಮ್ಮನ್ನು ನಿಲ್ಲಿಸುವವರು ಯಾರೂ ಇಲ್ಲ.

ಜಿತೇಂದ್ರ ಕುಂದೇಶ್ವರ said...

huttu habbada shubhashaya tadavaagi
che vijaya karnaatakadalli lekhana bamdilva ?

ಚಿತ್ರಾ ಕರ್ಕೇರಾ ದೋಳ್ಪಾಡಿ.. said...

Banadi sir..
Prathikrige Dhanyavadagalu
Kundeshwara sirgu...vandanegalu..hage V.K.dalli article barake shuru agidde second degreeyalli...
-Chitra

Shrinidhi Hande said...

belated ಹುಟ್ಟುಹಬ್ಬದ ಶುಭಾಶಯಗಳು.